കണ്ണുകൾക്ക് സമ്മർദം കൂടുമ്പോൾ കാഴ്ച മങ്ങുമോ? എങ്ങനെ പ്രതിരോധിക്കാം?(How to prevent eye strain)

ലക്ഷണങ്ങൾ സ്ഥിരമായി തുടരുകയോ കാഴ്ചയിൽ മാറ്റങ്ങൾ അനുഭവപ്പെടുകയോ ചെയ്താൽ കാരണം പരിശോധിക്കേണ്ടത് പ്രധാനമാണ്(How to prevent eye strain)

മൊബൈൽ ഫോൺ, കമ്പ്യൂട്ടർ, ടാബ്‌ലെറ്റ് തുടങ്ങിയ ഡിജിറ്റൽ സ്ക്രീനുകൾക്ക് മുന്നിൽ ദീർഘനേരം ചെലവഴിക്കുന്നവരിൽ സാധാരണ ഉണ്ടാകുന്ന പ്രശ്നമാണ് കണ്ണുകളിൽ സമ്മർദം. വായന, ഡ്രൈവിങ്, ചെറിയ അക്ഷരങ്ങൾ തുടർച്ചയായി വായിക്കുക, മങ്ങിയ വെളിച്ചത്തിൽ സ്ക്രീൻ നോക്കുക തുടങ്ങിയവയും കണ്ണുകൾക്ക് അമിത ക്ഷീണം ഉണ്ടാക്കാം.

സാധാരണയായി കണ്ണുകൾക്ക് വിശ്രമം നൽകുമ്പോൾ കുറയുന്ന താൽക്കാലിക പ്രശ്നമാണിത്. എന്നാൽ ലക്ഷണങ്ങൾ സ്ഥിരമായി തുടരുകയോ കാഴ്ചയിൽ മാറ്റങ്ങൾ അനുഭവപ്പെടുകയോ ചെയ്താൽ കാരണം പരിശോധിക്കേണ്ടത് പ്രധാനമാണ്

പ്രധാന ലക്ഷണങ്ങൾ(How to prevent eye strain)

കണ്ണിന് ക്ഷീണം അനുഭവപ്പെടുക

കൂടുതൽ സമയം സ്ക്രീനിൽ നോക്കിയതിന് ശേഷം കണ്ണുകൾ ഭാരമുള്ളതുപോലെയോ ക്ഷീണിച്ചതുപോലെയോ തോന്നാം. വായിക്കാനോ സ്ക്രീനിൽ ശ്രദ്ധ കേന്ദ്രീകരിക്കാനോ ബുദ്ധിമുട്ടും ഉണ്ടാകാം.

കണ്ണുകൾ ഡ്രൈ ആവുക

സ്ക്രീനിൽ ശ്രദ്ധയോടെ നോക്കുമ്പോൾ നമ്മൾ സാധാരണയേക്കാൾ കുറച്ച് തവണ മാത്രമായിരിക്കും കണ്ണടയ്ക്കൂ. ഇതുമൂലം കണ്ണുനീർ പാളി വേഗത്തിൽ ഉണങ്ങുകയും കണ്ണുകളിൽ വരൾച്ച, ചൊറിച്ചിൽ, അസ്വസ്ഥത ഉണ്ടാകുകയും ചെയ്യാം

കണ്ണിൽ നിന്ന് വെള്ളം വരുക

കണ്ണ് ഡ്രൈ ആകുമ്പോൾ ശരീരം അതിനോട് പ്രതികരിച്ച് അമിതമായി കണ്ണുനീർ ഉൽപ്പാദിപ്പിക്കാനും സാധ്യതയുണ്ട്. അതുകൊണ്ട് കണ്ണുകൾ ഡ്രൈ ആകുമ്പോൾ തന്നെ വെള്ളം വരുന്നതും ചിലരിൽ കാണാം.

കാഴ്ച മങ്ങുക

ദീർഘനേരം അടുത്തുള്ള വസ്തുവിലോ സ്ക്രീനിലോ ശ്രദ്ധ കേന്ദ്രീകരിച്ചതിന് ശേഷം ദൂരെയുള്ള വസ്തുക്കൾ താൽക്കാലികമായി വ്യക്തമായി കാണാത്ത അവസ്ഥ ഉണ്ടാകാം. ഫോക്കസ് ചെയ്യാൻ കൂടുതൽ സമയം എടുക്കുന്നതും ശ്രദ്ധിക്കേണ്ട ലക്ഷണമാണ്.

തലവേദന

കണ്ണുകൾക്ക് നിരന്തരം ഫോക്കസ് ചെയ്യേണ്ടിവരുന്നത് ചിലരിൽ തലവേദനയ്ക്ക് കാരണമാകാം. പ്രത്യേകിച്ച് സ്ക്രീൻ ഉപയോഗത്തിന് ശേഷം നെറ്റിയിലും കണ്ണിന് ചുറ്റുമുള്ള ഭാഗത്തും വേദന അനുഭവപ്പെടാം.

ലൈറ്റ് സെൻസിറ്റിവിറ്റി

കണ്ണിന് അമിതമായ ക്ഷീണം ഉണ്ടാകുമ്പോൾ സാധാരണ വെളിച്ചം പോലും അസ്വസ്ഥതയുണ്ടാക്കുന്നതായി തോന്നാം. മൊബൈൽ അല്ലെങ്കിൽ കമ്പ്യൂട്ടർ സ്ക്രീനിലെ പ്രകാശം സഹിക്കാൻ ബുദ്ധിമുട്ടും ചിലർക്ക് ഉണ്ടാകാം.

കണ്ണുകൾ ചുവക്കുക

വരൾച്ചയും തുടർച്ചയായ കണ്ണിന്റെ ഉപയോഗവും മൂലം കണ്ണുകൾ ചുവന്നതായി കാണപ്പെടാം. കണ്ണ് തിരുമ്മുന്ന ശീലം ഉണ്ടെങ്കിൽ ഇത് കൂടുതൽ വഷളാകാം.

കഴുത്തിലും തോളിലും വേദന

കണ്ണിന്റെ സമ്മർദം മാത്രമല്ല, സ്ക്രീൻ ഉപയോഗിക്കുന്ന രീതിയും ശരീരത്തെ ബാധിക്കും. ഫോൺ താഴേക്ക് പിടിച്ചോ കമ്പ്യൂട്ടറിന് മുന്നിൽ മോശം പൊസിഷനിലോ ദീർഘനേരം ഇരിക്കുന്നത് കഴുത്ത്, തോൾ, പുറം എന്നിവിടങ്ങളിൽ വേദനയ്ക്ക് കാരണമാകാം.

കണ്ണിന്റെ സമ്മർദം എങ്ങനെ കുറയ്ക്കാം?

20-20-20 നിയമം പാലിക്കുക

സ്ക്രീൻ ഉപയോഗിക്കുന്നവർക്ക് ഏറ്റവും ഉപകാരപ്പെടുന്ന ഒരു ശീലമാണ് 20-20-20 റൂൾ. ഏകദേശം 20 മിനിറ്റ് സ്ക്രീൻ നോക്കിയ ശേഷം 20 അടി അകലെയുള്ള ഒരു വസ്തുവിലേക്ക് കുറഞ്ഞത് 20 സെക്കൻഡ് നോക്കുക. അടുത്തുള്ള വസ്തുവിൽ നിന്ന് കണ്ണിന്റെ ഫോക്കസ് മാറ്റാൻ ഇത് സഹായിക്കും.

ഇടയ്ക്കിടെ കണ്ണടയ്ക്കുക

സ്ക്രീനിൽ ശ്രദ്ധ കേന്ദ്രീകരിക്കുമ്പോൾ കണ്ണടയ്ക്കുന്ന തോത് കുറയാം. അതിനാൽ ബോധപൂർവം ഇടയ്ക്കിടെ കണ്ണടയ്ക്കുന്നത് കണ്ണിന്റെ ഉപരിതലത്തിൽ ഈർപ്പം നിലനിർത്താൻ സഹായിക്കും.

സ്ക്രീൻ ശരിയായ അകലത്തിൽ വയ്ക്കുക

കമ്പ്യൂട്ടർ സ്ക്രീൻ മുഖത്തിന് വളരെ അടുത്തായി വയ്ക്കാതിരിക്കുക. സ്ക്രീൻ കണ്ണിന്റെ നേരെക്കാൾ അല്പം താഴെയായി വരുന്ന രീതിയിൽ ക്രമീകരിക്കുന്നതും കഴുത്തിനും കണ്ണിനും കൂടുതൽ സുഖകരമാണ്

സ്ക്രീൻ തെളിച്ചം ക്രമീകരിക്കുക

മുറിയിലെ വെളിച്ചവുമായി പൊരുത്തപ്പെടുന്ന രീതിയിൽ സ്ക്രീൻ ബ്രൈറ്റ്നസ് ക്രമീകരിക്കുക. ചുറ്റുപാടിനെ അപേക്ഷിച്ച് സ്ക്രീൻ വളരെ തെളിച്ചമുള്ളതോ വളരെ ഇരുണ്ടതോ ആകരുത്.

ഫോണ്ട് വലുപ്പം കൂട്ടുക

ചെറിയ അക്ഷരങ്ങൾ വായിക്കാൻ കണ്ണുകൾക്ക് കൂടുതൽ പരിശ്രമിക്കേണ്ടിവരും. മൊബൈലിലും കമ്പ്യൂട്ടറിലും ആവശ്യത്തിന് ഫോണ്ട് വലുപ്പം കൂട്ടുന്നത് കണ്ണിന്റെ സമ്മർദം കുറയ്ക്കാൻ സഹായിക്കും.

ഉറക്കം

മതിയായ ഉറക്കം ലഭിക്കാത്തത് കണ്ണിന്റെ ക്ഷീണവും വരൾച്ചയും കൂടുതൽ ശ്രദ്ധയിൽപ്പെടാൻ കാരണമാകാം. സ്ഥിരമായ ഉറക്കശീലം നിലനിർത്തുന്നത് കണ്ണിന്റെ ആരോഗ്യത്തിനും പൊതുവായ ആരോഗ്യത്തിനും പ്രധാനമാണ്.

കോൺടാക്ട് ലെൻസ് ഉപയോഗിക്കുന്നവർ ശ്രദ്ധിക്കുക

കോൺടാക്ട് ലെൻസ് ഉപയോഗിക്കുന്നവർക്ക് കണ്ണിന്റെ വരൾച്ചയും അസ്വസ്ഥതയും കൂടുതൽ അനുഭവപ്പെടാം. ഡോക്ടർമാർ നിർദേശിക്കുന്ന സമയപരിധിക്ക് അപ്പുറം ലെൻസ് ഉപയോഗിക്കാതിരിക്കുകയും ശരിയായ ശുചിത്വം പാലിക്കുകയും വേണം.

കണ്ണിന് വിശ്രമം നൽകാൻ എന്തൊക്കെ ചെയ്യാം?

കണ്ണുകൾക്ക് ക്ഷീണം അനുഭവപ്പെടുമ്പോൾ കുറച്ചുനേരം സ്ക്രീനിൽ നിന്ന് മാറിനിൽക്കാം. കണ്ണുകൾ അടച്ച് വിശ്രമിക്കാം. കണ്ണുകൾ തിരുമ്മുന്നത് ഒഴിവാക്കുക. വരൾച്ച സ്ഥിരമായി അനുഭവപ്പെടുന്നവർ ഡോക്ടറുടെ നിർദേശപ്രകാരം കൃത്രിമമായ കണ്ണുനീർ ഉപയോഗിക്കേണ്ടി വന്നേക്കാം