ഫാറ്റി ലിവർ ഉള്ളവർ കഴിക്കേണ്ടതും ഒഴിവാക്കേണ്ടതും, ഡയറ്റിൽ ശ്രദ്ധിക്കേണ്ട കാര്യങ്ങൾ(Fatty Liver Diet Plan)

ശരീരഭാരത്തിൻ്റെ മൂന്ന് മുതൽ അഞ്ച് ശതമാനം വരെ കുറയുന്നത് പോലും കരളിലെ കൊഴുപ്പ് കുറയ്ക്കാൻ സഹായിക്കാം.(Fatty Liver Diet Plan)

കരളിൽ അമിതമായി കൊഴുപ്പ് അടിഞ്ഞുകൂടുന്ന അവസ്ഥയാണ് ഫാറ്റി ലിവർ. അമിതവണ്ണം, വയറിന് ചുറ്റുമുള്ള കൊഴുപ്പ്, പ്രമേഹം, ഇൻസുലിൻ റെസിസ്റ്റൻസ്, ഉയർന്ന ട്രൈഗ്ലിസറൈഡ്, വ്യായാമക്കുറവ്, അമിതമായ പഞ്ചസാരയും കലോറിയും അടങ്ങിയ ഭക്ഷണശീലം തുടങ്ങിയവ ഫാറ്റി ലിവറുമായി ബന്ധപ്പെട്ടിരിക്കുന്നു. ഫാറ്റി ലിവർ ഉള്ളവർ ഏറ്റവും ശ്രദ്ധിക്കേണ്ട ഒന്ന് ഭക്ഷണക്രമമാണ്.

അമിതവണ്ണമുള്ളവർക്ക് ക്രമേണ ഭാരം കുറയ്ക്കുന്നത് കരളിലെ കൊഴുപ്പ് കുറയ്ക്കാനും കരളിലെ വീക്കം, പാടുകൾ എന്നിവ കുറയ്ക്കാനും സഹായിക്കും. ശരീരഭാരത്തിൻ്റെ മൂന്ന് മുതൽ അഞ്ച് ശതമാനം വരെ കുറയുന്നത് പോലും കരളിലെ കൊഴുപ്പ് കുറയ്ക്കാൻ സഹായിക്കാം.

ചോറ് പൂർണമായി ഒഴിവാക്കേണ്ടതുണ്ടോ?(Fatty Liver Diet Plan)

ഫാറ്റി ലിവർ ഉണ്ടെന്നുകരുതി ചോറ് പൂർണമായി ഒഴിവാക്കേണ്ടതില്ല. എന്നാൽ അളവ് പ്രധാനമാണ്. ചോറിൻ്റെ അളവ് കുറച്ച് പച്ചക്കറികളും പ്രോട്ടീൻ അടങ്ങിയ ഭക്ഷണങ്ങളും കൂട്ടാം. കുത്തരി, ബ്രൗൺ റൈസ്, മറ്റ് മുഴുവൻ ധാന്യങ്ങൾ എന്നിവ ഭക്ഷണത്തിൽ ഉൾപ്പെടുത്താം. വെളുത്ത അരി പോലുള്ള ഉയർന്ന ഗ്ലൈസെമിക് ഇൻഡക്സ് ഭക്ഷണങ്ങൾ വലിയ അളവിൽ പതിവായി കഴിക്കുന്നതിനേക്കാൾ ഫൈബർ കൂടുതലുള്ള മുഴുവൻ ധാന്യങ്ങളും പച്ചക്കറികളും തിരഞ്ഞെടുക്കുന്നതാണ് കൂടുതൽ നല്ലത്.

പഞ്ചസാര കുറയ്ക്കുക

ഫാറ്റി ലിവർ ഉള്ളവർ പ്രത്യേകം ശ്രദ്ധിക്കേണ്ട ഒന്നാണ് അധിക പഞ്ചസാര. ചായയിലും കാപ്പിയിലും അധികം പഞ്ചസാര ചേർക്കുന്നത് കുറയ്ക്കുക. മിഠായി, കേക്ക്, ബിസ്കറ്റ്, ഐസ്ക്രീം, മധുരപലഹാരങ്ങൾ, പാക്കറ്റ് ജ്യൂസുകൾ, മധുരം ചേർത്ത പാനീയങ്ങൾ എന്നിവയും നിയന്ത്രിക്കണം. പ്രത്യേകിച്ച് സോഫ്റ്റ് ഡ്രിങ്ക്സ്, എനർജി ഡ്രിങ്ക്സ്, പഞ്ചസാര ചേർത്ത ജ്യൂസുകൾ പോലുള്ള പാനീയങ്ങളിൽ അടങ്ങിയിരിക്കുന്ന ഫ്രക്ടോസ് ഉൾപ്പെടെയുള്ള ലളിതമായ പഞ്ചസാരയുടെ അളവ് കൂടുതലാകാം. ഇത്തരം പാനീയങ്ങൾ ഒഴിവാക്കുകയോ പരമാവധി കുറയ്ക്കുകയോ ചെയ്യുക.

പ്രോട്ടീൻ ഒഴിവാക്കരുത്

ഫാറ്റി ലിവർ ഉള്ളവർ ഭക്ഷണം കുറയ്ക്കുന്നതിനിടെ പ്രോട്ടീൻ വളരെ കുറയ്ക്കുന്നതും നല്ല ശീലമല്ല. പയർ, പരിപ്പ്, കടല, ചെറുപയർ തുടങ്ങിയ പയർവർഗങ്ങൾ ഡയറ്റിൽ ഉൾപ്പെടുത്താം. മീൻ, തൊലി നീക്കം ചെയ്ത ചിക്കൻ, മുട്ട തുടങ്ങിയവയും വ്യക്തിയുടെ ആരോഗ്യസ്ഥിതിക്ക് അനുസരിച്ച് ഭക്ഷണത്തിൽ ഉൾപ്പെടുത്താം. പ്രത്യേകിച്ച് കൊഴുപ്പ് കൂടുതലുള്ള ഇറച്ചി, പ്രോസസ്ഡ് മീറ്റ് എന്നിവയുടെ ഉപയോഗം കുറയ്ക്കുന്നതാണ് ഉചിതം.

എണ്ണ പൂർണമായി ഒഴിവാക്കേണ്ടതില്ല

ഫാറ്റി ലിവർ ഉണ്ടെന്ന് കരുതി എല്ലാ കൊഴുപ്പുകളും ഒഴിവാക്കേണ്ടതില്ല. ഏത് കൊഴുപ്പാണ്, എത്ര അളവിലാണ് കഴിക്കുന്നത് എന്നതാണ് പ്രധാനം. വെണ്ണ, നെയ്യ്, കൊഴുപ്പ് കൂടുതലുള്ള മാംസം, ഡീപ് ഫ്രൈഡ് ഭക്ഷണം തുടങ്ങിയ പൂരിത കൊഴുപ്പ് കൂടുതലുള്ള ഭക്ഷണങ്ങൾ നിയന്ത്രിക്കാം. പരിപ്പ്, വിത്തുകൾ, മത്സ്യം, സസ്യാധിഷ്ഠിത ആരോഗ്യകരമായ കൊഴുപ്പുകൾ എന്നിവ മിതമായ അളവിൽ ഭക്ഷണത്തിൽ ഉൾപ്പെടുത്താം. മെഡിറ്ററേനിയൻ ഭക്ഷണരീതിയിൽ ഒലീവ് ഓയിൽ, മത്സ്യം, നട്സ്, വിത്തുകൾ, പയർവർഗങ്ങൾ, പച്ചക്കറികൾ, മുഴുവൻ ധാന്യങ്ങൾ എന്നിവയ്ക്ക് പ്രാധാന്യമുണ്ട്.

ബേക്കറി ഭക്ഷണം കുറയ്ക്കുക

കേക്ക്, പേസ്ട്രി, ഡോണട്ട്, ക്രീം ബിസ്കറ്റ് തുടങ്ങിയ ബേക്കറി ഭക്ഷണങ്ങളിൽ പഞ്ചസാര, കൊഴുപ്പ്, കലോറി എന്നിവ കൂടുതലായിരിക്കാം. ഇവ ദിവസേനയുള്ള ഭക്ഷണത്തിന്റെ ഭാഗമാക്കുന്നതിന് പകരം അപൂർവമായി മാത്രം കഴിക്കുന്നത് നല്ലതാണ്. അൾട്രാ പ്രോസസ്ഡ് ഭക്ഷണങ്ങൾ, മധുരപലഹാരങ്ങൾ, പ്രോസസ്ഡ് മീറ്റ് എന്നിവ പരമാവധി കുറയ്ക്കാനാണ് MASLD സംബന്ധിച്ച യൂറോപ്യൻ മാർഗനിർദേശങ്ങളും ശുപാർശ ചെയ്യുന്നത്.

ഫാസ്റ്റ് ഫുഡ് കുറയ്ക്കുക

ബർഗർ, ഫ്രൈഡ് ചിക്കൻ, ഫ്രഞ്ച് ഫ്രൈസ്, പിസ, നൂഡിൽസ് തുടങ്ങിയ ഫാസ്റ്റ് ഫുഡ് പതിവാക്കുന്നത് അമിതമായ കലോറി, കൊഴുപ്പ്, ഉപ്പ് എന്നിവയിലേക്ക് നയിക്കും. പുറത്തുനിന്ന് ഭക്ഷണം കഴിക്കുമ്പോഴും ഗ്രിൽ ചെയ്ത വിഭവങ്ങൾ, പച്ചക്കറി കൂടുതലുള്ള വിഭവങ്ങൾ, കുറച്ച് എണ്ണയിൽ തയ്യാറാക്കിയ ഭക്ഷണം തുടങ്ങിയവ തിരഞ്ഞെടുക്കുന്നത് സഹായകരമാണ്.

തേങ്ങയും വെളിച്ചെണ്ണയും പൂർണമായി ഒഴിവാക്കണോ?

നാടൻ ഭക്ഷണത്തിൽ തേങ്ങയും വെളിച്ചെണ്ണയും സാധാരണമാണ്. ഫാറ്റി ലിവർ രോഗികൾ ഇവ പൂർണമായി ഒഴിവാക്കണമെന്നില്ല. എന്നാൽ വെളിച്ചെണ്ണ ഉൾപ്പെടെയുള്ള പൂരിത കൊഴുപ്പ് കൂടുതലുള്ള എണ്ണകൾ അമിതമായി ഉപയോഗിക്കുന്നത് ഒഴിവാക്കുക. കറികളിൽ എണ്ണയുടെ അളവ് കുറയ്ക്കുകയും ഒരേ ഭക്ഷണത്തിൽ എണ്ണ, തേങ്ങ, വറുത്ത വിഭവങ്ങൾ എന്നിവ വലിയ അളവിൽ ഒരുമിച്ച് ഉൾപ്പെടുത്താതിരിക്കുകയും ചെയ്യാം.

വെള്ളം കുടിക്കുന്നത് പ്രധാനമാണ്

സാധാരണയായി ആവശ്യത്തിന് വെള്ളം കുടിക്കുക. എന്നാൽ വെള്ളം കൂടുതലായി കുടിച്ചാൽ മാത്രം ഫാറ്റി ലിവർ മാറും എന്നല്ല. കരളിലെ കൊഴുപ്പ് കുറയ്ക്കുന്നതിൽ ഭക്ഷണരീതി, ശരീരഭാരം നിയന്ത്രിക്കൽ, ശാരീരിക പ്രവർത്തനം തുടങ്ങിയവയ്ക്കാണ് പ്രധാന പങ്ക്.

കാപ്പി നല്ലതാണോ?

പഞ്ചസാരയും ക്രീമും അധികമായി ചേർക്കാത്ത കാപ്പി ചില കരൾരോഗങ്ങളുമായി ബന്ധപ്പെട്ട പഠനങ്ങളിൽ നല്ലതാണെന്ന് കണ്ടെത്തിയിട്ടുണ്ട്. എന്നാൽ എല്ലാവർക്കും ഒരേ രീതിയിൽ കാപ്പി അനുയോജ്യമാകണമെന്നില്ല. എന്നാൽ കാപ്പിയെ ഫാറ്റി ലിവറിന്റെ ചികിത്സയായി കാണരുത്. ഉറക്കക്കുറവ്, അസിഡിറ്റി തുടങ്ങിയ പ്രശ്നങ്ങൾ ഉണ്ടെങ്കിൽ ഡോക്ടറുടെ നിർദേശം പരിഗണിക്കണം.

ഭക്ഷണത്തോടൊപ്പം വ്യായാമവും

ഫാറ്റി ലിവർ നിയന്ത്രിക്കാൻ ഭക്ഷണത്തിൽ മാറ്റം വരുത്തുന്നതിനൊപ്പം ശാരീരിക പ്രവർത്തനവും പ്രധാനമാണ്. വേഗത്തിൽ നടക്കുക, സൈക്കിൾ ഓടിക്കുക, നീന്തുക തുടങ്ങിയ മിതമായ വ്യായാമങ്ങൾ ചെയ്യാം. പേശികളുടെ ശക്തി വർധിപ്പിക്കുന്ന റെസിസ്റ്റൻസ് വ്യായാമങ്ങളും പ്രയോജനകരമാണ്. ആഴ്ചയിൽ കുറഞ്ഞത് 150 മിനിറ്റ് മിതമായ ശാരീരിക പ്രവർത്തനം ചെയ്യാം. ദീർഘനേരം തുടർച്ചയായി ഇരിക്കുന്ന ശീലം കുറയ്ക്കുന്നതും പ്രധാനമാണ്.